KOHHRAN (PIANGTHAR) CHUNGLAMA LAK CHHOH(RAPTURE) 1THESS 4:13-17

Ringtute beisei leh thil nghahhlelh awm tak chu Lei hrehawm chhuah sana, ringtitute chung lama lak chhohva kan awm hun tur hi a ni. Piangtharte van boruaka lak chhohva kan awm hun tur hi Bible chhuitu mithiamte’n “Rapture” hlim tawpkhawk, nuam lutuk an vuah a ni. A lo kal lehna hi chhawnghnih a awm a, a hmasa zawk chu Kohhran tân lei thleng lovin boruakah a lo kal ang chu chu Krista Ni (Rapture) chu a ni. A chhawnghnihna chu Kohhran nên lei thlenga a lo kal hun tur Lalpa Ni tih a ni.
Ringtute lak chhoh huna thil lo awm turte :
1. Ringtu kal hmasate ( thi-muhil) thlarau tuna chunglam Paradis-a han chawl mêkte hi, Kristan ama rualin a rawn chhukpui hmasa ang. Piangthar thi tawh zawng zawngte chu thlâna phûm emaw phûm loh emaw, Pathian thiltihtheihnain ropui takin a kaitho leh vek ang a, taksa, rilru leh thlarau neiin  thawhlehna taksa thar neiin an rawn tho ang. (1Thess 5:23;1Kor 15:51-54)
2. Ringtu, nung dama lo la awm rengte erawh chu “mit khap kâr lova tihdanglamin an awm ang” Elija ang khân, tichuan ringtu muhil tawhte lo tho lehte nên chuan a rualin boruakah khian lak chhohvin kan awm ang.
3. Kohna ri kan hria ang:Lalpa ngei chu authâwm nên, vantirhkoh chungnung ber aw nên, Pathian Tawtawrâwt ri nen , van atangin a lo chhuk dawn a ni. “... chutih hunah chuan mitthiten Pathian Fapa aw an hria ang a, a hria apiang an nung ang”.(Joh 5:25) tih a ni a, piangthar lo te erawh chuan  kohna ri hi an hre ve lovang.
4. Inthenna râpthlâk ber a thleng ang: Rinna taka Krista zawm lo, piangthar lo, Thlarau Thianghlima chhinchhiahna nei lote zawng zawng chu, hnutchhiahin an awm vek ang. Piangthar dik takte erawh chu chunglamah lak chhohin kan awm ang. He hunah hian inthenna râpthlak ber a lo awm dawn a, piangthar leh piangthar lo inthenna a ni ang. Hmangaih berte pawh chatuan atân then atul tawh ang. A va râpthlâk dawm em !!! I piangthar dik tak tak em ? Ringtu lâk chhoh (Rapture) hun atân i in peih tawh tak tak em?
5. Lâwmman semna a awm ang: Ringtu mi piangthar(Kohhran) lâk chhoh hunah Krista Rorêlna thutphah hmaah ringtu zawng zawngte hi khawvêla kan awm laia Lalpa rawng kan bawlna leh kan thiltih ang zela rorêl sakin kan awm anga, titha te chuan lâwmman an dawng anga, titha lote erawh chuan lâwmman pawh dawng lovin zak takin Lalpa hi kan tâwk dawn a ni, meia kaltlang ang maiin, chhandamna erawh chu kan chang ang. Chuvângin fello tak leh dik lo tak leh chapo taka rawng bawltute leh Pathian thu zirtirna dik lova kal puitute nihna chu a langfiah tawh ang. Chuvângin Krista Ni-ah chuan mi eng ang nge kan nih dawn? Krista Ni thlirin dik tak leh thahnemngaiin Lalpa rawng i bawl ang u. Lalpan chhiartute malsawm che u rawh se.